Rusiye ordusı Odesağa uçucısızlarnen ücüm etti, beş kişi yaralandı. Bu aqta Odesa vilâyetiniñ arbiy memuriyet yolbaşçısı Oleg Kiper bildirdi.
Onıñ aytqanına köre, ücüm neticesinde çoq daireli ev ve diger vatandaş infrastruktura obyektleri zarar kördi. Dairelerde soñra söndürilgen yanğınlar çıqtı.
Altı daire bütünley yoq etildi, daa 36 daire qısmen zarar kördi. Beş kişi yaralandı, ekisi – 7 yaşında oğlan ve 9 yaşında qızçıq.
Rusiye arbiyleri çeşit silâ qullanıp, Ukrayina regionlarına muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri dep tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.