Qırımtatar vatandaş jurnalisti Osman Arifmemetov Rusiye apsinde 22 kilogrammğa azdı. Bu aqta anası Ediye Arifmemetovanıñ malümatına esaslanıp, qırımlı aq qorçalayıcı Lutfiye Zudiyeva bildirdi.
Onı 2024 senesi mayıs ayından berli tutulğan Rusiyeniñ Krasnoyarsk ülkesindeki Minusinsk apishanesinden Rusiyeniñ Orenburg vilâyetindeki Novotroitsk koloniyasına etap etkenler.
«Osman er keske selâm ve büyük minnetdarlıq ayttı. Çoq şey soradı – cevap berip yetiştiralmadım. Onıñ sesini eşitmege o qadar bahtlı edik», – dep ayta Arifmemetovanıñ aytqanlarını aq qorçalayıcı.
Osman Arifmemetov alâ daa Rusiye apsinde qala. «Qırım birdemligi» bildirgenine köre, Osman Arifmemetovnı Minusinskteki apishaneden çıqarıp, Çelâbinsk SİZOsına avuştırğanlar. Soy-soplarına yazğan mektübinde etap şaraitlerini tarif etip, 1944 senesiniñ qırımtatar sürgünliginen qıyasladı.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesi mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.