Rusiye akimiyeti tarafından 12 yılğa üküm etilgen Aqmescitteki ekinci «qırımlı musulmanlar davasınıñ» mabüsi Emil Cemadenovnıñ qasıq quyuldığı qayd etildi. Bu aqta qırımlınıñ ömür arqadaşı Liana Belâlova «Qırım birdemligi» cemaat birleşmesine haber etti.
Onıñ aytqanına köre, quyuldıq «SİZOda» peyda oldı ve «uzun vaqıttan berli özüni belli ete». Salavattaki İK-16 hadimleri (Başqortostan) Cemadenovğa apishane hastahanesinde ameliyat olmağa teklif etti, lâkin o, razı olmadı.
«Sağlığına doğru aş ve vitaminlernen qoltutmağa tırışamız. Ebet, epimiz qasevetlenemiz, çünki böyle quyuldıqlar ameliyat içün kerekli vaqıt beklemey. Patlaması mümkün, Allah saqlasın», – dep tarif etti Belâlova.
Onıñ qayd etkenine köre, körüşüvde aqayı üç yıl içinde ilk sefer oğullarını kördi. Al-azırda tikiş bölüginde örnekçi olıp çalışa.
2016 senesi oktâbrniñ 12-nde Qırımda beş qorantanıñ evinde tintüvler keçirilgen edi. Beş qırımtatarı Rusiyede ve işğali altındaki Qırımda yasaqlanğan «Hizb ut-Tahrir» teşkilâtında iştirak etkeninde qabaatlandı: Rustem İsmailov, Uzeir Abdullayev, Teymur Abdullayev, Emil Cemadenov, Ayder Saledinov.
Rostov-na-Donu Cenübiy okrugınıñ arbiy mahkemesi Aqmescitteki «Hizb ut-Tahrir davasınıñ» mabüslerine 2019 seyensi iyün ayında üküm çıqardı. Soñra Rusiyeniñ Yuqarı mahkemesiniñ qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Bundan evel, 2024 senesi martnıñ 16-nda, Ukrayina Baş prokurorınıñ ofisi Abdullayevniñ ceza izolâtorında tutulması sebebinden istilâcı memlekette akimiyet vekilleri tarafından cenk qanunlarını ve adetlerini bozuv boyunca (Ukrayina Ceza kodeksiniñ 438-inci maddesiniñ 1-inci qısmı) cinaiy dava başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.